Ghar

khelne aaoge kya upar? vo chillati hai
Chhat se lgi vo awaaz
teen manzilein paar kar
Jeene se Hoti hui..
maano seediyo se utar kar
Seedha mere kaano tak ati hai.

Vo Priyanka hai.. meri Padosan
Umr mein mujhse bhht chhoti hai
Par akl mein meri bhi dadi hai
Bachpan mein mujhse maths pdti thi
Ab mujhe tik tok video banana sikhati hai.
Kaafi bdi ho gai hai..lambi patli gori
Ekdum uski barbie doll Jaisi
Vo doll jo ek din mujhse toot gai thi..
Aur fir uski dadi dandanati hui humare ghar aayi thi
meri dadi se shikayat karne
Jaise ki dadi mujhe daant hi degi ek doll k lie
Meri dadi hai vo..kuch na kehti
Par main itni dusht thi..shaitan ekdum
Bachpan se hi nautanki ka shauq tha Mano
Us kamre me hui sari baat sun ri thi
Diwan par lete hue..jaise sach me so rhi hu
Sab Dhokha kha Gaye the..sivay meri dadi k

Dadi k 14 pote potiyan the waise to
Par main Sabse ladli thi
Aur mazedaar ye tha
K ye baat sab ne Maan li thi
Hoti bhi kyu Ni
School topper jo thi
Humara rishta itna gehra tha k
paper mera hota tha
Taiyari hum dono karte the
Main gatta, pen, pencil or scale pack krti
To dadi Tilak ki thali aur dahi cheeni ki katori
Yun to Tilak mere bhai Ko bhi lgta tha
par asar shayad humesha mere liye hi karta tha
Tbhi to uske boards mein bhi mujhe lgaya gya
Bechara margin pe hi sahi par pass to hua

Dadi bhi bdi Kamaal thi meri
Poori school life pdhne k lie bolti Rahi
Aur jab naukri lg gai finally
Toh Ganga Jamuna bahane lgi
Ekdum bachho ki tarah
Aur Jab main apni phli salary se
Uske lie bhoore rang ki saree layi
Pehen k aise itrai jaise nayi Dulhan ho
Ajab hi ladakpan tha un boodhi haddiyon me

Yun to kuch saal pehle hi vo is ghr se chli gai thi
But har doosre hafte main mil ati thi
Ek metro ka Safar aur do ghnte ki journey
Bas itna hi door tha mera ghar mujhse
Uski baato mein nayapan toh Ni tha
Voi apni bahu ki buraiyan
aur pahadi bhasha mein mujhe kosna
Ni khaan paali tas tarah tu
Keh keh k cooking seekhne Ko force Krna
Is Sab k beech achanak uska ek Sawaal
Jiska hona utna hi zaroori hai jitna Mahabharat mein chidiya ki ankh
"Mere Tulsi ke paudhe mein Pani daal diya tha?"
Aur main har Baar ek hi jawaab deti thi
"Ni dalungi to tu khud ayegi dalne?"

Nabbe ki ho chli hai ab dadi
Jhuk k chalti hai par itrana Ni Chhoota
Hazzaaro kilometres door chli gai thi usse
Par rishta humara tab b Ni toota
Long distance relationships kaam Ni kiye ab tak
Daily updates Dena bojh SA lgta hai
Par is rishte ki baat alag hai
mujhme uska Bachpan jhalakta hai
Maine dekha Ni uska Bachpan
Par hogi vo mere Jaisi hi
Yei chatorapan..aur bebaki
Kisi bhi baat pe do took jawaab de Dena
Hasna toh bas haste chle Jana
Aur chhoti chhoti baato pe ro Dena
Ma se lete hain log jo adat
maine apni dadi se li hain
Boodho Ko Sood asal se zyada pyara hota hai
Ye baat meri dadi ne saabit ki hai

Ab jab Priyanka awaaz lgati hai
Ya uski mummy mujhe chhat pe bulati hai
Toh Darr Ni lgta
Bdi ho gai hu main
Cheezein bhi Ni todti
Koi shikayat bhi Ni Hoti unko mujhse
Par is Makaan ki chhat pe rakhi
Tanki se riste Pani se geeli hui diwar k paas
Ek purane tub mein sookhe Tulsi k paudhe Ko dekh
Mere ghar ki mujhko yaad ati hai.